Waqt-e-safar qareeb hy bistar

Waqt-e-safar qareeb hy bistar samait lun..
bikharaa hu_aa hayaat kaa daftar sameT lun..

Phir jaane ham mile.n na mile.n ik zaraa ruko
Main dil ke aaiine men ye manzar samaiT lun..

Gairon ne jo suluuk kiye un kaa kyaa gilaa
Phainky hain doston ne jo patthar samaiT  lun..

Kal jaane kaise honge kahaaN honge ghar ke log
Aankhon men ek baar bharaa ghar samaiT lun..

Sail-e-nazar bhii Gam kii tamaazat se Khushk ho
Vo pyaas hai mile to samandar samaiT luN..

'Ajmal' bharak rahii hai zamaane main jitani aag
jii chaahataa hai siine ke andar samaiT lun...!!!